Ku wa 26 Gicurasi 2026 itsinda riyobowe na Guverineri w’Intara y’Amajyepfo, hamwe n’abagize Komite y’Umutekano y’Intara basuye Uruganda rw’Imyumbati rwa Kinazi ruherereye mu Karere ka Ruhango. Uru ruzinduko rwari rugamije gusuzuma imikorere y’uruganda no kurebera hamwe uko rwakomeza gutera imbere mu buryo burambye.

Umuyobozi Mukuru w’Uruganda KABARIRA R. Kriss yagaragaje intambwe ikomeye imaze kugerwaho. Izi ntambwe zirimo, Uruganda ntirukigira imyenda ku bahinzi batanga imyumbati, ndetse rwishyura neza imisoro isabwa a n’Ikigo cy’Imisoro n’Amahoro (RRA). Hanagaragajwe ko amasoko arimo kwagurwa mu gihugu hose, cyane cyane muri gahunda yo kugaburira abanyeshuri binyuze muri EAX. Byongeyemo, imashini nshya zizatuma uruganda rukora ku kigero cya 80% cy’ubushobozi bwarwo.  Hari ubufatanye kandi na MINAGRI na RAB bugamije kwagura ubuhinzi bw’imyumbati no gutanga imbuto z’indobanure, ndetse hakaba hari gahunda yo guha abahinzi imbuto, ifumbire n’ubufasha mu buhinzi bw’imyumbati.

Uru ruganda rufite gahunda yo kugura ubutaka rukajya ruhinga imyumbati, hagamijwe kongera umusaruro no kugabanya kwishingikiriza ku bahinzi bo hanze. Hanagaragajwe ko hari gahunda yo guhuza igiciro cy’imyumbati ku bahinzi bose, ndetse no kwagura ibicuruzwa bishya ku isoko birimo isombe n’ibiribwa byoroshye (snacks). Ibi byose bigamije kongera ubukungu bw’igihugu no guteza imbere ubuzima bw’abaturage.

Guverineri w’Intara y’Amajyepfo KAYITESI Alice  yashimye imikorere y’uru ruganda, abasaba  gukomeza gutekereza icyatuma rukora rugatanga umusaruro ndetse n’akazi muri rusange, yabibukije ko gukorana n’abahinzi babaha ibyo babagomba bizafasha abo bahinzi n’uruganda muri rusange.