Ku wa 30 Werurwe 2026, ku biro by’Intara y’Amajyepfo habereye inama y’umutekano y’igihembwe cya gatatu 2025–2026. Iyi nama yibanze ku kurebera hamwe uko umutekano wagenze mu mezi atatu ashize, ibibazo byabangamiye imibereho y’abaturage aho byakemutse, ndetse n’imyiteguro yo kwibuka ku nshuro ya 32 Jenoside yakorewe Abatutsi mu 1994 (#Kwibuka32).

Iyi nama yitabiriwe n’inzego z’umutekano zose kuva ku karere kugeza ku Ntara, ndetse n’abayobozi b’uturere. Yabereye mu biro by’Intara y’Amajyepfo, iyoborwa n’Umunyamabanga Nshingwabikorwa w’Intara, NSHIMIYIMANA Védaste.

Umuyobozi wa Polisi mu Ntara y’Amajyepfo, ACP Désiré Twizere, yagaragaje ishusho y’umutekano mu Ntara mu mezi atatu ashize, asobanura aho ibibazo byagaragaye n’ingamba zafashwe mu kubikemura.

Mu ijambo rye, ES w’Intara NSHIMIYIMANA Védaste yashimiye inzego z’umutekano ku murava n’ubwitange bagaragaza mu kurinda abaturage. Yabasabye gukomeza uwo murava no kurushaho kwita ku mutekano w’abaturage, cyane cyane mu gihe hegereye ibikorwa byo kwibuka ku nshuro ya 32.