Ku wa 29 Mata 2026, ku biro by’Intara y’Amajyepfo habereye inama yahuje ubuyobozi bw’Intara n’inzego zatowe za Private Sector Federation (PSF) kuva ku rwego rw’Akarere kugeza ku rwego rw’Intara.

Iyi nama yibanze ku kurebera hamwe uburyo bwo kongera ishoramari rihuriweho, kubyaza umusaruro amahirwe ari mu Turere, ndetse no kunoza imikorere n’imikoranire hagati y’inzego za Leta n’abikorera mu rwego rwo guteza imbere iterambere ry’Intara.

Inama yayobowe na Guverineri w’Intara y’Amajyepfo, Kayitesi Alice, yitabiriwe n’abayobozi b’Uturere ndetse n’abahagarariye PSF ku rwego rw’Akarere no ku rwego rw’Intara. Abikorera bagaragaje umusanzu wabo mu kubaka imigi n’ibikorwaremezo mu Turere tugize Intara y’Amajyepfo, mu gihe abayobozi b’Uturere nabo bashimangiye amahirwe ahari mu gushora imari hakurikijwe ibishushanyo mbonera by’Uturere.

Iyi nama yagaragaje ko ubufatanye hagati y’inzego za Leta n’abikorera ari urufunguzo mu guteza imbere ubukungu bw’Intara, no kubaka imigi n’ibikorwaremezo bihamye, bigamije kuzamura imibereho myiza y’abaturage no guteza imbere u Rwanda rugendera ku bufatanye n’ubushobozi bw’abaturage barwo.