Guverineri Alice KAYITESI ari kumwe n’itsinda ririmo Umuyobozi w'Urwego rw'igihugu rushinzwe kugenzura iyubahirizwa ry'ihame ry'uburinganire n'ubwuzuzanye Rose RWABUHIHI, Umunyamabanga Uhoraho muri minisiteri y’Uburinganire n’Iterambere ry’Umuryango Mireille BATAMULIZA, Umuyobozi w’Akarere ka Muhanga KAYITARE Jacqueline basuye Umudugudu wa Cyanika mu Kagari ka Masangano Umurenge wa Nyabinoni. Uyu mudugudu ukaba waratoranyijwe kuzeserezwamo umuhigo wo kwimakaza ihame ry'Uburinganire.

Mu butumwa abayobozi bagejeje ku baturage b’Akagari ka Masangano, babasabye kwita ku burere bw’Abana babatoza indangagaciro z’umuco nyarwanda, kubaka umuryango ushoboye kandi utekanye birinda amakimbirane mu miryango. Bakanguriwe kwita ku isuku n’isukura.

By’umwihariko Guverineri yasabye Abagize umuryango kubahana, kwirinda ubuharike kuko bugira ingaruka zikomeye ku bana ndetse n’imiryango muri rusange. Nyuma yo gutanga ubutumwa butandukanye Guverineri afatanyije n’izindi nzego bireba  ndetse n’abaturage  bacyemuriye hamwe ibibabazo.