Taliki ya 18.07.2023 mu Turere tugize Intara y'Amajyepfo   hatangijwe ubukangurambaga bw'iminsi mirongo ine ( 40 days) bwo gukemura Ibibazo by'Abaturage no kubegereza Serivisi z'irangamimerere n'indangamuntu.

Ku rwego rw'Intara iyi gahunda yatangirijwe mu Karere ka Kamonyi  Umurenge wa Musambira, Akagari ka Buhoro, ahakemuwe Ikibazo  cy'abanyamuryango ( barenga 1000)  ba Koperative KODARIKA  ihinga umuceri mu gishanga gihuza Umurenge wa Musambira na Karama yo mu Karere ka Kamonyi.

Mu gutangiza ubu  bukangurambaga, Guverineri Kayitesi Alice mu ijambo rye, yibukije abaturage kujya birinda amakimbirane, ibibazo bafitanye bigakemuka ndetse ibinaniranye ubuyobozi bukabikemura, bityo bagahuriza umugozi umwe w’ubumwe n’iterambere. Yasoje aganira n’Abaturage ku ingingo zitandukanye z’iterambere n’imibereho myiza.