Ku wa 14 Mata 2025, mu Karere ka Nyaruguru habereye umuhango wo kwibuka ku nshuro ya 32 Jenoside yakorewe Abatutsi mu 1994. Uyu muhango wateguwe ku bufatanye bwa Guverineri w’Intara y’Amajyepfo Kayitesi Alice, Ubuyobozi bw’Akarere ka Nyaruguru, hamwe n’umuryango Ibuka, ukitabirwa n’abaturage benshi.

Aha hantu h’icyibutso, hazirikanwe Abatutsi basaga 30,000 biciwe batwikiwe muri Kiliziya ya Paruwasi ya Kibeho ndetse n’abandi biciwe mu nkengero zayo. Ni ahantu h’ihuriro ry’amateka akomeye y’akarengane Abatutsi bahuye na yo mu gihe cya Jenoside.

Mu ijambo rye, Guverineri Kayitesi Alice yibukije ko kwibuka ari uburyo bwo gusubiza agaciro abishwe bazira uko bavutse, anashimangira ko ari n’umwanya wo kwegera abayirokotse:

“Kwibuka Jenoside yakorewe Abatutsi ni umwanya mwiza wo gusubiza agaciro Abatutsi bishwe bazira akarengane, no kurushaho kwegera abayirokotse tukabafata mu mugongo, kubafasha gukira ibikomere basigiwe na Jenoside, tukabagaragariza urukundo.”

Abaturage n’inshuti z’igihugu bitabiriye uyu muhango basabwe gukomeza kwita ku mateka y’igihugu, kwigisha urubyiruko ukuri kuri Jenoside, no guharanira ko itazongera kubaho ukundi.

Kwibuka32 i Nyaruguru byongeye kugaragaza ko ubumwe, urukundo n’ubufatanye ari byo shingiro ry’ahazaza h’igihugu, kandi ko guharanira ukuri ari inshingano ya buri wese.