Ku wa 13 Mutarama 2025 habaye  igikorwa cyo gutangiza Urugerero rudaciye ingando rw'Inkomezabigwi icyiciro cya 12, ku rwego rw'Igihugu,  mu Kagari ka Kabagesera mu Murenge wa Runda mu Karere Kamonyi.

Guverineri ‪Kayitesi Alice wari kumwe na Minisitiri Dr. Jean D’amascene Bizimana yashimiye uru rubyiruko rwarangije amashuri yisumbuye mu mwaka ushize wa 2023/2024, abibutsa ko ari imbaraga z'Igihugu, bityo ko yizeye umusanzu ufatika mu bikorwa by'Urugerero batangiye mu gufasha umuryango nyarwanda mu iterambere

Minisitiri, Dr Bizimana Jean Damascène yabwiye uru rubyiruko 321 ko ikibazo cy’abafite ingengabitekerezo ya Jenoside ari umwanzi w’iterambere ry’igihugu.

Minisitiri Bizimana yabasabye kwigisha urubyiruko bagenzi babo ndetse n’abakuru bafite ingengabitekerezo ya Jenoside kuyireka kuko iri mu bibazo bidindiza Iterambere ry’Igihugu.

Ati “Icyo tubifuzaho ni uguhindura imyumvire y’abafite iyo ngengabitekerezo ya Jenoside kuko isenya Ubumwe bw’abanyarwanda.”

Dr Bizimana avuga ko amacakubiri n’ivangura bigomba gucika abanyarwanda bagakomeza kubaka Ubumwe n’ubudaheranwa.

Minisitiri Dr Bizimana Jean Damascène yashyize ibuye ry’ifatizo ahazubakwa Isoko rya Kijyambere mu Kagari ka Kabagesera mu Murenge wa Runda mu Karere ka Kamonyi 

MINUBUMWE ivuga ko kuva mu mwaka wa 2013 kugeza ubu Urubyiruko 559686 bamaze kwitabira Urugerero rw’inkomezabigwi kandi ko byatanze umusaruro mwiza.

Dr Bizimana avuga ko umwaka ushize wa 2024 abitabiriye urugerero mu rwego rw’igihugu bakoze ibikorwa bifite agaciro ka miliyari 2 y’amafaranga y’uRwanda.