Ibiganiro ku kwimakaza ihame ry’uburinganire no kurwanya ihohoterwa rishingiye ku gitsina

byateguwe ku bufatanye bw’Akarere ka Ruhango, Intara y’Amajyepfo, Urwego rushinzwe iyubahirizwa ry’uburinganire n’ubwuzuzanye hagati y’abagabo n’abagore, n’abafatanyabikorwa batandukanye, bibera mu Ruhango, biyoborwa na Guverineri Kayitesi Alice ari kumwe n’umugenzuzi mukuru w’uburinganire Rose Rwabuhihi, yanitabiriwe n’abayobozi batandukanye mu nzego zitandukanye kuri uyu wa 23 Werurwe, ku nsanganyamatsiko igira iti, “Uruhare rw’inzego z’ibanze mu kwimakaza ihame ry’uburinganire no kurwanya ihohotera rishingiye ku gitsina”.

Mu ijambo ry’ikaze, umuyobozi w’Akarere ka Ruhango, Bwana Habarurema Valens, yibukije ko imibare y’abaturage ba Ruhango, igaragaza ko abaturage b’igitsina gore n’abagabo benda kungana mu mibare, bityo yizeza ko ihame ry’uburinganire muri Ruhango rigomba gukurikizwa mu nzego zose.

Guverineri Yashimye ubufatanye na GMO mu gufasha Uturere mu guhugura abantu n’inzego zitandukanye ku ihame ry’uburinganire, asaba ko ibi biganiro bigomba gusiga ihame ry’uburinganire n’ubwuzuzanye ryumvikanye ndetse anasaba abari aho kubaza aho batumva no gutanga ibitekerezo bigamije kuryubaka.

Umugenzuzi mukuru w’ihame ry’uburinganire Madame Rwabuhihi Rose, yibukije ko u Rwanda ruyobowe n’Itegeko nshinga rifite amahame harimo n’iry’uburinganire, yibutsa ko iryo hame Atari uguteza imbere umugore gusa, ahubwo ari uguha amahirwe buri munyarwanda wese hatitawe ku gitsina cyangwa ibindi.

Yibukije ko ari amahirwe mbere ya byose kandi ya bose, yavuze ko kubuza amahirwe umuntu uwo ari we wese ari ugusubiza inyuma igihugu kandi no kudakurikiza icyo itegeko nshinga risaba, ari icyaha gihanwa n’amategeko.

Ibi biganiro byanitabiriwe kandi n’izindi nzego zifatanya n’urwego rushinzwe iyubahirizwa ry’uburinganire n’ubwuzuzanye mu gushyira mu bikorwa inshingano zabo. Hatangwa n’ubundi butumwa butandukanye binyuze mu mikino, amagambo yagiye ahavugirwa n’ibindi biganiro bitandukanye byahatangiwe.