Ku wa 16 Mata 2026, Minisitiri w’Uburinganire n’Iterambere ry’Umuryango, Uwimana Consolee, hamwe na Guverineri w’Intara y’Amajyepfo Kayitesi Alice, bagiranye inama n’abayobozi b’amadini n’amatorero mu Ntara y’Amajyepfo. Iyo nama yibanze ku kurebera hamwe ibibazo bibangamiye umuryango, uruhare rw’amadini n’amatorero mu kubishakira ibisubizo, guteza imbere uburinganire n’ubwuzuzanye, no kubaka umuryango utekanye.

Mu kiganiro cyatanzwe na PS Mireille Batamuliza, yagaragaje imvano y’ibibazo bibangamiye umuryango, asaba abayobozi b’amadini n’amatorero gukangurira abayoboke babo kubungabunga umuryango, kwita ku burere bw’abana no kubarinda, ndetse no guteza imbere uburinganire n’ubwuzuzanye hagati y’umugabo n’umugore.

Minisitiri Uwimana Consolee yasabye abayobozi b’amadini n’amatorero kongera imbaraga mu ivugabutumwa ryubaka amahoro n’ubwubahane mu muryango, kurwanya amakimbirane n’ihohotera, no gushishikariza abagabo n’abahungu kugira uruhare mu guteza imbere uburinganire n’ubwuzuzanye.

Iyi nama yagaragaje ko amadini n’amatorero ari abafatanyabikorwa b’ingenzi mu kubaka umuryango utekanye, uharanira amahoro n’iterambere, kandi ko uruhare rwabo mu guhindura imyumvire y’abaturage ari ingenzi mu rugendo rwo kubaka u Rwanda ruzira ihohotera n’akarengane.