Ku wa 15 Gicurasi 2025, mu Karere ka Huye habereye inama nyunguranabitekerezo y'Intara, igamije kuganira ku byavuye mu bushakashatsi ku mibereho y’ingo n’ibipimo by’ubukene mu Rwanda EICV7. Iyi nama yayobowe na Guverineri w’Intara y’Amajyepfo, Madamu Kayitesi Alice, ari kumwe n’Umuyobozi mu Kigo cy’Igihugu cy’Ibaruramibare, Madamu Kayitesi Claudette.

Iyi nama yabaye umwanya wo gusobanurira abayobozi ndetse n’abafatanyabikorwa batandukanye ibipimo by’ubukene, hagamijwe gukomeza gushyiraho ingamba zizamura imibereho y’Abaturage . Abitabiriye inama bagarutse ku buryo bwakoreshwa kugira ngo ubushakashatsi bwa EICV7 bufashe mu igenamigambi ry’iterambere ry’Intara.

Abitabiriye inama n’ibyaganiriweho

Iyi nama yari yitabiriwe n’abayobozi b’amadini n’amatorero ku rwego rw’Intara, abahagarariye inzego z’umutekano, urwego rw’abikorera (PSF), abayobozi b’inama njyanama z’uturere, abayobozi b’uturere, intumwa za Komite y’Urubyiruko (NYC), abahagarariye Inama y’Igihugu y’Abagore (NWC) mu Ntara n’abandi bafatanyabikorwa.

Muri iyi nama, hagarutswe ku buryo bwo kurwanya ubukene hifashishijwe ubushakashatsi bwa EICV7, ndetse n’uburyo ibipimo byagaragajwe bishobora gufasha mu gufata ingamba nshya ziteza imbere imibereho y’abaturage.

Guverineri Kayitesi Alice yasabye abayobozi kugira uruhare rufatika mu gushyira mu bikorwa ingamba zo kurwanya ubukene, anashimira ubufatanye hagati y’inzego zitandukanye mu gukemura ibibazo byugarije imibereho rusange.

Mu gusoza, Guverineri Kayitesi Alice yagaragaje ko ubufatanye bw’inzego zitandukanye ari ingenzi mu kurandura ubukene, asaba ko ibitekerezo byatanzwe bikurikizwa mu bikorwa bihoraho byo guteza imbere imibereho y’abaturage.