Ku wa 30 Gicurasi 2025, Guverineri w’Intara y’Amajyepfo, Kayitesi Alice, hamwe n’Umuyobozi Mukuru wa RTB, Paul Umukunzi, bayoboye inama nyunguranabitekerezo igamije gushishikariza ihangwa ry’umurimo mu Ntara y’Amajyepfo. Iyi nama yari ifite insanganyamatsiko igira iti “Ihangwa ry’umurimo, intego dusangiye”, yibanze ku ngamba zinoze zigamije guteza imbere imirimo ihoraho, cyane cyane ku rubyiruko.

Inama yahuje abayobozi b’uturere, abikorera, abahagarariye imiryango yigenga, abanyamadini, abahagarariye urubyiruko, ndetse n’amashuri makuru na za kaminuza. Aba bose baganiriye ku buryo bwo kongera amahirwe y’akazi, kurwanya ubushomeri, no gushyiraho ingamba zizamura ubukungu binyuze mu guhanga imirimo minshya.

Muri iyi nama, Guverineri Kayitesi Alice yagarutse ku ruhare rw’ubufatanye hagati y’inzego zitandukanye mu guteza imbere umurimo. Yagaragaje ko hakenewe uburyo bushya bwo gushyigikira imishinga y’urubyiruko no kongerera ubushobozi abarimo gushaka kwihangira imirimo.

Paul Umukunzi, Umuyobozi Mukuru wa RTBwe yasabye ubufatanye bw’inzego z’amashuri makuru na kaminuza mu gutegura gahunda ziteza imbere ubumenyi ngiro  buzatuma urubyiruko rubasha kwihangira imirimo. Yasobanuye ko kubaka ubushobozi bushingiye ku bumenyi ngiro ari ingenzi mu gukemura ikibazo cy’ubushomeri.

Abitabiriye inama bagaragaje ibitekerezo bitandukanye, baganira ku buryo bwo kongera amahugurwa, gukoresha ikoranabuhanga mu kwihangira imirimo, no gushishikariza urubyiruko kugana amasoko mpuzamahanga. Inama yaranzwe no gusangira ibitekerezo, aho buri wese yagize uruhare mu gutanga ibitekerezo bigamije guteza imbere ihangwa ry’umurimo.

Mu gusoza inama, abayobozi bakuru basabye ko ingamba zafashwe zigomba gushyirwa mu bikorwa, ndetse hakabaho ubufatanye bw’inzego zose mu kongera amahirwe y’akazi, by’umwihariko ku rubyiruko rw’u Rwanda.