Ku wa 12 Kanama 2025, mu Karere ka Nyanza habereye inama mpuzabikorwa y’Intara y’Amajyepfo, yahurije hamwe ubuyobozi bw’Intara n’Uturere tuyigize. Iyi nama yari igamije gusuzuma imishinga y’iterambere iri gukorwa ndetse n’iteganyijwe mu gihe kiri imbere, hagamijwe kunoza igenamigambi no kongera imbaraga mu bikorwa bifitiye abaturage akamaro.

Minisitiri w’Ubutegetsi bw’Igihugu, Bwana Dominique Habimana, ni umwe mu bayitabiriye. Mu ijambo rye, yagarutse ku nshingano z’ubuyobozi mu guteza imbere imibereho y’abaturage. Yagize ati: “Dushinzwe kwita ku mibereho n’iterambere by’umuturage, ari yo mpamvu dusabwa kwegera umuturage. Turasabwa gukemura ibibazo by’abaturage ku gihe no kubaha serivisi nziza.” yagaragaje ko umuturage ari we nkingi y’iterambere, bityo ubuyobozi bukwiye kumushyira imbere mu igenamigambi n’ibyemezi bifatwa.

Inama yasuzumye imishinga itandukanye irimo iy’ubuhinzi n’ubworozi, imihanda n’ibikorwaremezo, uburezi, ubuzima, ndetse n’imitangire ya serivisi mu nzego z’ibanze. Abayobozi bagaragarijwe ko kugira ngo iyi mishinga igere ku ntego zayo, bisaba ubufatanye, gukorera hamwe, no guhora bashyize imbere inyungu z’umuturage.

Mu gusoza inama, abayobozi biyemeje gukomeza kwegera abaturage, kumva ibibazo byabo no kubikemura mu buryo burambye. Basabwe kandi gukorana ubwitange, ubunyangamugayo n’ubushishozi mu gushyira mu bikorwa imishinga y’iterambere, hagamijwe kugira  Intara ifite abaturage bateye imbere mu mibereho n’ubukungu.