Ku wa 08 Mata 2026, biciye kuri video conference, Guverineri w’Intara y’Amajyepfo, Madamu Kayitesi Alice, yayoboye inama igamije kuganira ku mishinga y’iterambere ishingiye ku bukungu bw’uturere (LED). Iyi nama yibanze ku kurebera hamwe ishyirwa mu bikorwa ry’iyo mishinga, gusuzuma imbogamizi zihari ndetse no gutegura ingamba zo kuyihutisha kugira ngo igere ku ntego zayo.

Inama yitabiriwe n’abayobozi b’uturere, abagize akanama k’imicungire y’imishinga, ndetse n’abahagarariye inzego za Leta zirimo Local Administrative Entities Development Agency (LODA) na Minisiteri y’Ubutegetsi bw’Igihugu (MINALOC). Abitabiriye bagarutse ku ruhare rw’iyi mishinga mu guteza imbere ubukungu bw’uturere, kongera imirimo, no guteza imbere imibereho myiza y’abaturage.

Mu biganiro byabaye, hagarutswe ku mbogamizi zimwe na zimwe zigaragara mu ishyirwa mu bikorwa ry’iyi mishinga, zirimo ibibazo by’ubushobozi, imiyoborere n’imicungire y’imishinga, ndetse n’ihuzabikorwa hagati y’inzego zitandukanye. Guverineri Kayitesi Alice yasabye abayobozi b’uturere n’abafatanyabikorwa gukomeza gushyira imbaraga mu guhangana n’izo mbogamizi, no kwihutisha ibikorwa kugira ngo LED igire impinduka zigaragara mu buzima bw’abaturage.