Ku wa 21 Gashyantare 2025, Intare Cultural Center i Nyanza yakiriye igitaramo cy’ubudasa kigamije gushimira uturere twahize utundi ku Rugerero rw’Inkomezabigwi icyiciro cya 12, ndetse no guhemba indashyikirwa mu guteza imbere umuco nyarwanda. Iki gitaramo cyateguwe ku bufatanye bwa Minisiteri y’Ubumwe bw’Abanyarwanda n’Inshingano Mboneragihugu (MINUBUMWE) ndetse n’Inteko y’Umuco.

Mu rwego rwo gushimira intore, uturere dutatu two mu Ntara y’Amajyepfo twagaragaje ubudasa mu bikorwa by’Urugerero rw’Inkomezabigwi rwashyizwe imbere. Kamonyi yaje ku isonga n’amanota 87.3%, ikurikirwa na Nyaruguru yagize amanota 86.2%, mu gihe Ruhango yabaye iya gatatu n’amanota 85.7%.

Umuyobozi Nshingwabikorwa w’Itorero no Guteza Imbere Umuco, Uwacu Jurienne, mu ijambo rye yashimye ibikorwa by’indashyikirwa byakozwe n’abasore n’inkumi mu gihe cy’Urugerero kuva ku wa 13 Mutarama kugeza ku wa 28 Gashyantare 2025. Ibyo bikorwa birimo kubaka amacumbi y’abatishoboye, gusana amacumbi ashaje, gufata neza ibikorwa remezo, kubaka amarerero n’ibiro by’inzego z’ibanze, gutera ibiti hagamijwe kubungabunga ibidukikije, n’ibindi bigamije iterambere ry’imibereho myiza y’abaturage. Uwacu Jurienne yasabye urubyiruko gukomeza kurangwa n’umuco wo gukunda igihugu no kugikorera.

Muri iki gitaramo, hanabaye amarushanwa yo guteza imbere umuco nyarwanda. Ayo marushanwa yari mu byiciro birimo abashimiwe mu guteza imbere ururimi rw’Ikinyarwanda, abashimiwe mu guteza imbere umuco nyarwanda n’indangagaciro zawo, ndetse n’abashimiwe mu guteza imbere umurage w’u Rwanda. Uwacu Jurienne yijeje abitabiriye ko MINUBUMWE izakomeza gufatanya n’abafatanyabikorwa batandukanye mu guteza imbere umuco no kubungabunga umurage w’u Rwanda.

Iki gitaramo cyaranzwe n’ubutumwa bw’ubumwe, gukunda igihugu no kwishimira umuco w’abanyarwanda. Cyerekanye ko urubyiruko rufite uruhare runini mu iterambere ry’igihugu no kubaka ejo hazaza h’ibyiringiro.