Ku wa 30 Gicurasi 2024 mu  murenge wa Mukindo, Akarere ka Gisagara hizijihijwe  umunsi mpuzamahanga wa Croix Rouge ku rwego rw'Igihugu wari ufite insangamatsiko igira iti" Komera ku bumuntu" Witabiriwe n'itsinda ryavuye muri Croix Rouge y'URwanda, ryari riyobowe na Madame MUKANDEKEZI Françoise Umuyobozi wa Crouge Rouge Rwandaise, ari kumwe n'abashyitsi baturutse muri Croix Rouge ku rwego rw'ibihugu batandukanye no ku kwego rw'isi (CICR).

Uyu munsi usanzwe wizihizwa  ku wa 08/05 ariko  wahujwe no gutaha umuyoboro w'amazi  mu murenge wa Mukindo wubatswe ku bufatanye na croix rouge mu Rwanda, ungana n'ibirometero 13 ukaba ufite agaciro ka Frw 370,955,320. Umushyitsukuru yari Guverineri w'Intara y'Amajyepfo , Madame KAYITESI Alice akaba yari ahagarariye Minisitiri w'ubutegetsi bw'igihugu.

Umuyobozi wa Croix Rouge mu Rwanda , Madame MUKANDEKEZI Françoise, yagaragaje bimwe mu bikorwa bya Croix rouge mu Rwanda bagizemo uruhare mu myaka 62 imaze ushinzwe. Yashimiye Ubuyobozi bw'Akarere ubufatanye bagaragaje mu bikorwa birimo gukumira ibiza, gufasha abaturage kwikura mu bukene no kubaka umuyoboro w'amazi wa Mukindo. Yashimiye kandi n'Umuyobozi w'Intara y'Amajyepfo ubufatanye bwiza adahwema kugaragaza.

Guverineri w’Intara Madame KAYITESI Alice  yashimiye Croix Rouge ibikorwa by'indashyikirwa birimo gutabara abahuye n'ibiza, gutanga za Ambulance ku Bitaro, kurwanya ibyorezo, kubaka umuyoboro w'amazi, kubakira abatishoboye, ubufasha bahaye utundi turere nka Nyamagabe na Nyaruguru muri gahunda ya VUP ndetse no gutoza kandi abaturage gahunda yo kuzigama no kugurizanya hamwe n'ibikorwa bafatanyije n'Akarere, abaturage ndetse n'abandi bafatanyabikorwa.