Guverineri KAYITESI Alice ari kumwe n'umuyobozi w'Akarere ka kamonyi Dr. NAHAYO Sylivere mu Murenge wa Rugalika yatangije  ku rwego rw'intara  Urugerero rw'Inkomezabigwi ikiciro cya 11. Atangiza urugerero, yabanje gushyira ibuye ry'ifatizo ahagiye kubakwa "Igihango cy'Urungano Center.

inyubako izaba ibumbatiye amateka ku gukunda igihugu ndetse izaba ifite n'ibibuga by'imyidagaduro. Mu Ijambo rya Guverineri, yashimiye urubyiruko ruri ku Rugerero arwibutsa ko arirwo mbaraga z'igihugu ko bagomba gukora bagateza imbere Akarere n’igihugu muri rusange.

yakomeje abasaba Ko nubwo U Rwanda rumaze gukora urugendo rushimishije mu guharanira ubumwe bw'abanyarwanda hari abagifite Urwango ruhembere amacakubiri cyane kuri internet, yasoje asaba Urubyiruko gusubiza ukuri abo batifuriza urwanda . Urugerero rw’uyu mwaka rufite insanganyamatsiko igira iti: “ DUHAMYE UMUCO W’UBUTORE KU RUGERERO”.

Ruzitabirwa n’intore zirangije amashuri yisumbuye mu mwaka w’amashuri 2022-2023 mu Turere twose, abarangije amashuri y’ubwarimu ndetse n’abarangije amashuri y’Ubumenyingiro.

Mu bikorwa bizaranga Intore ku Rugerero, harimo kwita ku bikorwa remezo, kuzamura imibereho myiza y’abaturage, gufasha no kumva imikoreshereze y’ikoranabuhanga mu iterambere, kurwanya ingengabitekerezo ya Jenoside n’ibindi byaha ndetse n’uburere Mboneragihugu n’ibindi bikorwa byubaka Igihugu.