Ku  mugoroba wo ku wa 29 Mata 2024, Ku biro by'Intara y’Amajyepfo, Guverineri Kayitesi Alice yayoboye umuhango w’ihererekanyabubasha hagati y’uwari Umunyamabanga Nshingwabikorwa w'Intara w'Agateganyo ucyuye igihe Bikomo Alfred n'umushya Nshimiyimana Vedaste, Ni umuhango witabiriwe n’abagize inama y’umutekano y’Intara, abayobozi b’uturere n’abanyamabanga nshingwabikorwa b’uturere tw’Amajyepfo ndetse n’abakozi bakorera ku biro by'Intara.

Umunyamabanga  Nshingwabikorwa w’agateganyo, ucyuye igihe Bikomo Alfred, yamurikiye umusimbuye ibikorwa by’intara n’imishinga migari isabwa gushyirwamo imbaraga, ndetse n’inshingano zimutegereje muri uwo mwanya agiyemo. Umunyamabanga Nshingwabikorwa mushya, Nshimiyimana Vedaste yashimiye ubuyobozi bw’intara ikaze ahawe ndetse yizeza abayobozi bose baba ab’uturerere n’abanyamabanga nshingwabikorwa imikoranire myiza.

Yagize ati” Intara ifite inshingano zo kureberera no kugira inama uturere mu bikorwa bya buri munsi; rero inshingano nahawe nsa nk’umunyeshuri ubaye mwarimu”.  Yakomeje asaba abakozi b’Intara kubona inshingano nk’amahirwe yo kwiga aho kuzifata nk’ikibazo, kugira ngo birusheho koroshya no kuryoherwa n’akazi.

Guverineri w’Intara y’Amajyepfo wari n’umushyitsi mukuru muri uyu muhango yahaye ikaze Umunyamabanga Nshingwabikorwa mushya, ndetse  amwizeza ubufatanye muri byose.Yamusabye kuzaba umuyobozi uhanga udushya. Uyu muhango kandi waranzwe no guhererekanya inyandiko z’akazi ku bayobozi binjiye mu nshingano ndetse n’ucyuye igihe nk’ikimenyetso cy’ihererekanyabubasha,hanatangwa impano z’ishimwe.