Ku wa 19 Kanama 2025, ku bufatanye na Minisiteri y’Inganda, ku biro by’Intara habereye ibiganiro bigamije ubukangurambaga kuri gahunda y’imyaka itanu yo guteza imbere abikorera no guhanga imirimo ku rubyiruko. Iyi gahunda yashyizweho hagamijwe guteza imbere ubukungu bw’igihugu binyuze mu kongerera ubushobozi abikorera, gushora imari mu rubyiruko, no guteza imbere ibikorwa bishya by’ubucuruzi bigira uruhare mu iterambere ry’igihugu.

Abitabiriye inama 

Muri ibi biganiro, Umunyamabanga Nshingwabikorwa w’Intara NSHIMIYIMANA Védaste yifatanyije n’Abayobozi b’Uturere bashinzwe iterambere ry’ubukungu, abahagarariye abikorera, abafite ubumuga, urubyiruko ndetse n’abagore. Abitabiriye ibiganiro baganiriye ku ntego nyamukuru zigamijwe kugerwaho binyuze muri gahunda y’imyaka itanu ndetse banasuzuma uruhare rwabo mu ishyirwa mu bikorwa ryayo. 

Gahunda y’imyaka itanu yitezweho kongera ubushobozi bw’abikorera binyuze mu gutanga amahugurwa, kongera amahirwe yo kubona inguzanyo, no gushyigikira ibikorwa byabo. Urubyiruko narwo rwashyizwe imbere muri iyi gahunda, aho ruzahabwa amahirwe yo kwiga imyuga, guhabwa ubumenyi no gushyigikirwa mu guhanga imirimo. Byongeye, iyi gahunda yitezweho guteza imbere ubukungu burambye binyuze mu mishinga y’ubushakashatsi no guhanga udushya, byose bigamije kuzamura ibikorerwa imbere mu gihugu.

Abitabiriye ibiganiro basabwe kugira uruhare rufatika mu ishyirwa mu bikorwa ry’iyi gahunda. Ubuyobozi bw’Uturere bwagaragaje ko bugomba gushyiraho igenamigambi rihamye ku rwego rw’imirenge n’utugari kugira ngo gahunda igere kuri buri wese. Abikorera nabo basabwe gukomeza gushyira hamwe no gufatanya nk’imwe mu ntwaro zo kugera ku iterambere ryihuse.

Umunyamabanga Nshingwabikorwa W'Intara NSHIMIYIMANA Védaste