Ku wa 21 Gicurasi 2026, muri Kaminuza y’u Rwanda, Ishami rya Huye, habereye umuhango wo gusoza icyiciro cya karindwi (7) cy’imenyerezamwuga ry’urubyiruko rw’abakobwa mu nzego z’ibaze. Uyu muhango witabiriwe n’abayobozi batandukanye ndetse n’abanyeshuri bo mu mashuri makuru n’amakaminuza akorera mu Karere ka Huye.

Mu bitabiriye harimo Mireille Batamuliza, Umunyamabanga Uhoraho muri Minisiteri y’Uburinganire n’Iterambere ry’Umuryango; Umutoni Nadine, Umugenzuzi Mukuru w’Ihame ry’Uburinganire; Guverineri Kayitesi Alice w’Intara y’Amajyepfo; Valens Uwineza, Umunyamabanga Mukuru wa RALGA; A. Sebutege, Umuyobozi w’Akarere ka Huye; n’abandi bayobozi b’inzego za leta n’abikorera.

Iri somo ry’imenyerezamwuga ryitabiriwe n’abakobwa bagera kuri 200, bamaze amezi atandatu (6) bimenyereza umwuga mu mashami atandukanye mu turere no muri City of Kigali. Nyuma y’igihe cy’imenyerezamwuga, abagera kuri 91 muri bo bamaze kubona imirimo, uko byagenze bikaba byaragaragajwe muri ubu buryo:

• 40 babonye akazi mu nzego z’ibanze;
• 6 babonye akazi mu zindi nzego za Leta;
• 14 babonye akazi mu miryango itari iya Leta;
• 29 babonye akazi mu bigo by’abikorera;
• 2 bihangiye imirimo yabo.

Uyu muhango wari intego yo gushimira abakobwa barangije iki cyiciro, gusangiza abitabiriye ibyavuye mu imenyereza , no kugaragaza umusanzu w’iyi gahunda mu kuzamura ubushobozi bw’urubyiruko no kongera amahirwe y’akazi ku bakobwa.

Abayobozi bagaragaje ko gahunda nk’izi zifite uruhare runini mu guteza imbere ubushobozi bw’abakiri bato, guha amahirwe angana ku bagore n’abakobwa, no gushyigikira iterambere rirambye mu turere. Banashimangiye ko hakenewe gukomeza ubufatanye hagati ya za kaminuza, inzego za leta, imiryango itegamiye kuri leta n’abikorera mu gushakira hamwe ibisubizo byongera akazi n’ubushobozi ku rubyiruko.