Akarere ka Kamonyi ni kamwe mu turere tugize Intara y’Amajyepfo, gafite amahirwe menshi yo gushoramo  imari, ashobora guteza imbere ubukungu bw’akarere ndetse no guteza imbere imibereho myiza y’abaturage. Dore amahirwe akomeye aboneka mu Karere ka Kamonyi:

Ubucukuzi bw’amabuye y’agaciro: Ubucukuzi bw’amabuye y’agaciro ni urwego rukomeye mu Karere ka Kamonyi kuko rutanga umusaruro ufatika mu bukungu bw’akarere ndetse rukaba isoko ry’akazi ku baturage. Amabuye y’agaciro acukurwa muri aka karere ni Cassiterite na Coltan, afite umusaruro ungana na Toni 570 buri mwaka. Uru rwego rutanga akazi ku bakozi 2,300 (abagabo 1,800 n’abagore 500).

Akarere ka Kamonyi kagira ikirere cyiza: cyakira neza ibihingwa bitandukanye nko ibigori, ibishyimbo, soya, imboga, ndetse n’ikawa. Ibi bitanga amahirwe akomeye mu buhinzi no kubuteza imbere.

Ubutaka bwera: Ubutaka bw’Akarere ka Kamonyi bwera cyane, bukaba bwiza mu guhinga ibihingwa bitandukanye. Ubu butaka bushobora kuba umusingi mu guteza imbere ubuhinzi bw’ibyoherezwa mu mahanga.

Ubwiza bw’akarere: Akarere ka Kamonyi kazwiho kugira ubwiza buhebuje bw’imiterere karemano, harimo imisozi yihariye n’ibibaya bitoshye. Ubu bwiza karemano butanga amahirwe yo guteza imbere ubukerarugendo bushingiye ku miterere y'akarere.

Ishoramari mu hoteli n’imishinga ijyanye n’ubukerarugendo:  Kubera ko Akarere ka Kamonyi kari hafi y’imijyi ya Kigali na Muhanga, hari amahirwe  yo guteza imbere amahoteri n’ibindi bikorwa bijyanye n’ubukerarugendo 

Ibikorwa byo kubaka ububiko bw’ibicuruzwa: Akarere ka Kamonyi kari hafi y’umujyi wa Kigali, bityo kubaka ububiko bw’ibicuruzwa ni urwego rwiza rushobora kuzamura ishoramari muri aka karere.

Inganda zitunganya umusaruro w’ubuhinzi:  mu karere ka Kamonyi hari amahirwe yo guteza imbere inganda zishobora gutunganya imbuto n’imboga, bikaba umusingi mwiza wo guteza imbere ubuhinzi n’iyoherezwa mu mahanga ry’ibihingwa.