Igitaramo #TuriMuRuhango: umwanya wo gusigasira umuco n’iterambere

Ku wa 16 Kanama 2026, mu Karere ka Ruhango habereye igitaramo gikomeye “TuriMuRuhango” cyitabiriwe n’abaturage basaga 6,000–7,000 baturutse mu gihugu hose. Iki gikorwa cyahurije hamwe ibiganiro ku mateka n’umuco nyarwanda, imurikabikorwa ry’udushya n’ibikorwa by’iterambere, imbyino n’ubusizi gakondo, byose bigamije gusigasira indangagaciro z’umuco nyarwanda no gusangiza abaturage ibyiza byagezweho.

Guverineri w’Intara y’Amajyepfo, Kayitesi Alice, yifatanyije n’abaturage n’ubuyobozi bwa Ruhango District muri iki gikorwa. Mu ijambo rye, yashimangiye ko “Turi mu Ruhango” ari gahunda igamije gufasha abaturage bagikeneye gufatwa ukuboko, kugira ngo basindagizwe bagere ku iterambere rirambye.

Yibukije ko intambwe yatewe mu myaka 32 ishize yaturutse ku gukomeza kwishakamo ibisubizo bishingiye ku muco nyarwanda no guhanga udushya. Yongeyeho ko iki gikorwa ari umwanya wo kuganira ku byakorwa kugira ngo abaturage bishimire ibyagezweho, cyane ko cyabaye mu kwezi kwahariwe Umuganura.

Guverineri Kayitesi yakomeje asaba abaturage kwishimira ibyavuye mu buhinzi no mu nganda, ndetse bakanasaranganya amahirwe aboneka muri Ruhango, nk’uko Umuganura ubisaba. Yashimangiye ko gusangira no kwishimira ibyo igihugu cyagezeho ari inzira yo gukomeza kubaka ubumwe n’iterambere ry’Igihugu.

Aha Guverineri Kayitesi Alice ari gusura imurikabikorwa